بطلوا تنصبوا أنفسكم قضاة

لسه خابط في بوستين من شوية .. حاجة في غاية اللطافة .. صراحة ..

البوست الأول ||

أخت بتنتقد البنت اللي بتكتب فيها عن خطيبها المعتقل .. 
وبتتقزز جدا من كمية الايموشانات والقلوب .. اللي بتعملها على الفيس لخطيبها واللي اختفى من حياتها مره واحده ..
و بتقول انها بتحتقر نوعية البنات دول جدا ..

والبوست التاني ||

أخ .. مشير صفحة بنت .. وكاتب عنها ..انها كافرة ملحدة .. خرجت من الملة .. وبيحذر منها ..
الطريف في الامر .. إن البنت دي مريضة نفسيا ..
مصابة بحالة من الفصام .. وبتكتب بوستات خزعبلية .. من نوعية أنا أم المهدي المنتظر .. و ربنا بيوحي إليّ ..!!
مما يدل ان فيه حاجة مش طبيعية ..
وطبعا الناس ردوا عليه في البوست بتاعه وفهموه إنها مريضة وهوا مصر على رأيه..!!

أنا متفهم جدا إن الفيس إدى مساحة لكتير من الناس انهم يكتبوا ما يخطر على بالهم ..وقت ما هما عايزين ..
خلى كل واحد فاضي وما وراهوش شغله .. يقعد يدور على اخبار الناس .. ويشوف هما بيعملوا ايه ..
لغاية هنا .. وماشي .. مفيش مشكلة ..

لكن إننا نلاقي كل شوية واحد ولا واحدة نصبوا أنفسهم قضاة للحكم على أفعال العباد ..
واللي يستبيح الأعراض .. واللي يكفر .. واللي يحتقر .. واللي يلقح كلام ببوست ويذيله بهاشتاج ‫#‏مقصودة‬ ..

الأمر ده أصبح ظاهرة خرجت من نطاق الدعوة بالحسنى .. الى حيز التشهير .. ومحاولة التميز -بحق او بدون - للتعالي على خلق الله ..

قال رسول الله :
(إن من أحبكم إلي ، و أقربكم مني مجلسا يوم القيامة أحاسنكم أخلاقا ،
و إن أبغضكم إلي و أبعدكم مني مجلسا يوم القيامة الثرثارون ، و المتشدقون ، و المتفيهقون ،
قالوا : قد علمنا " الثرثارون و المتشدقون " فما " المتفيهقون ؟ "
قال : المتكبرون )

‫#‏ربنا_يهدينا‬